Ziza arrea perretxiko txikia eta jangarria da. Beste espezie batzuekin nahas daiteke, baina T. pardinum pozointsuarekin nahastea da arriskutsuena. Azken horrek tamaina handiagoa izaten du eta mardulagoa da, gainera, txapela ezkata zentrukide bakan eta beltzaxkaz estalia du.

Artikuluari buruz Egilea: Sorrera: 2011/12/01 Azken eguneraketa: 2013/12/26 Bisita-kopurua: 1022 Motzean Taxonomia Dibisioa: Basidiomycota Klasea: Agaricomycetes Ordena: Agaricales Familia: Tricholomataceae Deskribatzailea: (Schaeff.) P. Kumm. (1871) Sinonimoak Agaricus myomyces Agaricus pullus Agaricus terreus Gymnopus myomyces Tricholoma bisporigerum Tricholoma myomyces Ekologia Mikorrizikoa Jateko balioa Jangarria Perretxiko-garaia Perretxikorik ez Perretxikoak bai

Makromorfologia

Pileoa

3-8 cm diametroko txapela du, mamitsua eta hauskorra da. Hasieran konikoa den arren, forma laundua, titidun samarra izaten du gero, ertz biribilkatuekin. Kutikula lehorra eta askagarria du. Kolore gris argia edo gris beltzaxka izaten du, eta kolore bereko zuntzexka erradialek estaltzen dute.

Estipea

Hanka zilindrikoa eta leuna da, 3-6 x 0,8-1,5 cm-koa. Kolore zurixka edo zuri grisaxka izan dezake eta batzuetan pixkat ezkamatsua.

Orriak

Orri muxarratuak eta hankaren kolore berdinekoak.

Mamia

Mamia mehea, hauskorra eta zurixka da. Usainik ez du izaten baina zapore atsegina du, agian apur bat mikatza, inoiz ez irintsua.

Mikromorfologia

Esporak

Esporak zuri, leun eta eliptikoak dira. 5-8 x 3,5-5 μm-ko tamaina izaten dute.

Ekologia

Habitata

Euskal Herriko pinadietan arrunta da, ale askok eraturiko taldeak osatzen ditu. 

Perretxiko-garaia

Udazkenean ateratzen da, nahiz eta negu hasieran ikusi izan den.

Jateko balioa

Kalitate oneko jangarria da baina kontuz ibili behar da, Tricholoma pozointsuekin ez nahasteko.