Gaitz honen eragilea den sustantzia azido helbelikoa da. Sustantzia hau, soilik bi basidiomikototan behatu da,  Amanita vaginata eta Amanita rubesces-en. Askomikotoen phylumean ez da berdina gertatzen, zenbait espeziek eragiten baitute era honetako gaitzak. Genero ezagunenak, intoxikazio gehienak sortzen dituztelako, hurrengo hauek dira: Helvella, Morchella, Peziza, Sarcosphaera eta Gyromitra. Beraz askomikotoek eragindako gaixotasuna dela esan daiteke.

Kasu gehienetan, intoxikazio mota hau ez da hilgarria izaten, hala ere gaixoa hil deneko kasuak dokumentaturik daude. Gaixoa gaixotasunaren lehen fasean hil denen heriotzaren eragilea bihotzaren kolapsoa izan da. Gaixoa eritasunaren bigarren fasean hiltzen bada, heriotzaren eragilea giltzurruneko lesioak izan dira.

Gaixotasunaren eragilea azido helbelikoa denean soilik, sintomak onddoa irentsi eta 4 ordutara azaltzen dira. Gaixotasunak betik gorakoak, beherakoa eta ikterizia eragiten du. Kasu larrienetan muskuluen tetanizazioa behatu da.

Intoxikazioa Gyromitra esculenta-k eragiten badu beste izen bat ematen zaio, gyromitrina. Kasu honetan, sintomen agerpena berantiarra izaten da, 24-48 ordu igarotzen baitira sintomak agertu arte. Mitra muinak eragiten dituen lesioak larriagoak dira, giltzurrunean eta nerbio sisteman eragiten baitu. Krisialdien arteko denboran gaixoa loaldi sakon batean murgiltzen da. Gaitz hau, intoxikazio faloidiarraren oso antzekoa da.

Gure lurraldetan intoxikazio mota hau ez da oso arrunta izaten. Onddoa gordinik jaterakoan azaltzen baita. Azido helbelikoa 60 ºC-ko tenperaturan desnaturalizatu egiten baita. Gyromitraren kasua ezberdina da, onddoa egosi eta gero toxikoa izaten jarraitzen baitu, toxikoak diren sustantzien artean aipaturiko azidoaz gain beste sustantzia batzuk aurkezten ditu.