Zuhaixka edo 20 metroko zuhaitza izan daiteke. Noiz behinka zabaltzen da oinetik, baina orokorrean adaburuaren forma piramidala izaten da. Kolore berde ilunekoa, adar ugarikoa eta horizontalean edo pixka bat zirtzilaturik hazten dira. Sarritan eitea ezberdina da hazten den kokagunearen arabera. Enbor lodia du, 1,5 m-ra irits daitekeena. Azal mehekoa, sarritan laminak askatzen dira eta kolore gorri-grisaska du.

Hosto iraunkorrekoa da. Hostoak 10 - 30 x 3 mm bitartekoak dira, partzialki beherantz makurtuak, berde ilunak gainaldean eta berde-horixkak azpialdean. Hiru urtetan berde mantentzen dira. Ilera zapaldu batean kokatuak, hostoak txandakatuak izan ohi dira adarrean zehar. Oso toxikoak dira eta ez da komeni usaintzeko zapaltzea. Kimuak berde argiagoak eta 2 mm-koak dira.

Landare dioikoak dira. Oin arrek hosto galtzarbean ematen dituzte konoak. Kono edo estrobilo hauek bakartiak eta horiskak dira eta adarren azpialdean ezartzen dira. Udaberri hasieran adaburua zuritzen dute beren polen hodeiak askatu baino lehen. Oin emeetako hazi-hasikinak hosto-galtzarbean jaiotzen den pedunkulu labur baten puntan aurkitzen dira.

Forma oboidea dute eta oinaldean braktea berdexka batek biltzen ditu. Braktea hau garatu egiten da heldutasunean, hazia ia erabat estaltzen duen bildukin mamitsu gorri bat bihurtuaz. 

Europako parterik handienean, Asiako mendebaldean eta Afrikako iparraldean sakabanaturik dago. Nafarroako hego-erdialdean salbu, ale bakanak aurki daitezke mendietan sakabanatuta.