Landaretxo hau endemismo iberiarra dugu, eta Euskal Herrian soilik Nafarroan aurkitzen da lurraldearen hegoaldean, Ablitasen, hain zuzen ere. Herri honek gainera, bere ipar-mendebaldeko muga ezartzen du. Hori dela eta 'Zaurgarria' bezala sailkaturik dago Espezie Mehatxatuen Nafarroako Katalogoan.

Mulu zurkara eta arantzatsua dugu, gehienez 40 cm-ko altuera lortzen duena (normalean 10-30 cm). Zurtoin etzanak ditu edo dekunbente-tenteak eta asko adarkatzen da. Ile zuriz estalita egoten da, itxura kotoitsua emanez zurtoin gazteei. Aldiz, zurtoin zaharrenak glabreszenteak dira eta urte baten buruan, 3-8 cm-ko luzera lortzen dute.

Hosto peziolatuak dira eta paripinnatuak. Ilez estalitako folioloak dituzte eta errakisaren ertza arantza batez bukatzen da muturrean. Estipulak 4-9 mm-koak dira eta pezioloki estuki loturik daude, zurtoina inguratuz. Makroblastoetako hostoak 1,5-6,5 cm-koak dira eta 0,5-1,8 cm-ko pezioloa dute, tentea eta ile motzez beterik dagoena. Aldiz, brakiblastoek peziolo luzeagoa dute eta ile luzeak hau estaliz. Makroblastoetako hostoek 4-6 pare foliolo dituzte, txikiak (0,4-3 cm-koak) eta brakiblastoetakoek 4-8 pare foliolo handiagoak (3-11 x 1-4 mm), eliptikoak eta iletsuak.

Lore puztu iletsuak garatzen ditu, kolore zuri-horikoak, 2-3 aletako lukuetan multzokatzen direnak. Infloreszentziak brakiblastoen galtzarbetatik garatzen dira. Lukuak eseriak dira eta brakteak eta brakteolak dituzte. Brakteak 4-8 mm-koak dira, iletsuak; eta brakteolak 3-6 mm-koak, brakteen antzeko indumentuarekin. Pedizeloak 1-4 mm-koak.

Loratze sasoian zehar kaliza 18 mm ingurukoa eta tubularra da. Aldiz, fruktifikazio garaian 26 mm-raino puzten da eta globo itxura hartzen du, nerbiazio erretikulatu argia duelarik. Garai honetan gainera, ile zuriz beterik egoten da. 3,5-6 mm-ko hortzak ditu.

Korola horixka edo zurixka da, martzeszentea eta petaloak harizpien hodiari baturik egoten da. Estandartea 18-24 mm-koa da eta lamina obatu edo eliptikoa du. Hegoak 16-23 mm-koak dira, ia estandartearen tamainakoak. Laminaren oinarriko aurikula 1,5-2 mm-koa da eta kila, 15-20 mm-koa, hegoak baino motzagoa.

Fruitua leka motakoa da, unilokularra, ile zetakara disdiratsuekin. Kalizean barneraturik gelditzen da maiz. Karpoforoa 2-4 mm-koa da eta gorputza 5-6 x 1,5-2,5 mm-koa, oboideoa, ganbila eta pitzadura sakona du atzealdean. Haziek 2,5-3,5 x 3,5-5 mm-ko tamaina dute eta arreak dira.

Endemismo iberiarra dugu, eta Euskal Herrian soilik Nafarroan aurkitzen da lurraldearen hegoaldean, Ablitasen, hain zuzen ere. Herri honek gainera, bere ipar-mendebaldeko muga ezartzen du.