Zuhaiska halofitoa dugu, gatz-lur eta dunetan hazten dena, eta maiz itsasgoran ur azpian gelditzen da. Eurasia epel eta Afrikako iparraldean zehar dago banatuta eta Euskal Herriko kostaldean ere azaltzen da. Bere izen generikoa 'Halimus' hitzetik dator (gazia), eta espezifikoak Portulaca generoarekin duen antzekotasunari egiten dio erreferentzia.

Paduretako zuhaiska txiki eta grisaxka hau landare adartsua da. Altueran ez du inoiz metro eta erdia gainditzen. Oinarri zurkara du baina goialdea belarkara da, glabroa eta lepidotoa edo irintsua. Kimuak ez dira artikulatuak, familiako beste zenbait espezieetan bezala eta sustraikorrak dira, herrestariak edo tenteak.

Hosto lauak ditu, iraunkorrak, oposatuak, 30-50 x 3-6 mm-koak eta forma aldakorrekoak (espatulatutik lantzeolatura). Hostoek berde argi kolorea dute, ia zuriska eta glaukoak dira. Pezioloa hostoa bera baino argiagoa izaten da kolorez.

Itsas getozka monoikoa da, hau da, bi sexuetako loreak ditu. Hauen polinizazioa anemofiloa da eta itsas-brisan oinarritzen da. Loreak horiak dira eta buruxka antzeko egituratan biltzen dira, infloreszentzia panikuliformeak sortuz.

Lore arrek 4-5 ataleko periantoa dute. Atalak elkarren artean nahiko antzekoak dira eta ez dute ez apendizerik eta ezta brakteolarik ere. Lore emeek aldiz, 2-3 estigma dituzte, ez dute periantorik eta bi brakteola akreszente dituzte, 2-4 x 2-4 mm-koak. Brakteola hauek forma obodeltoidea dute eta fruktifikazioan zehar elkarri lotuta egoten dira. Muturrean hiruki formako apendize terminal bat dute, alde bakoitzean bi lobulu dituena. Sesilak edo pedizelatuak izan daitezke eta azpialde leuna izaten dute, nahiz eta batzuetan luzakin kamuts batzuekin estalita egoten den.

Akenio motako fruituak ditu, hidrokoriara edo uraren bidezko barreiatzera moldaturik daudenak. Kaliz subsesilak dituzte, triangeluarrak eta hiru lobulu kamutsez eratutakoak (berdinak ala desberdinak). Haziak kolore gorrikoak dira.

Europako kostalde atlantiko eta mediterranearrean zehar agertzen da, baina Ipar Amerikako ekialdeko kostaldean eta Afrikako iparraldean. Kantaurialdean ez da oso arrunta baina ondo kontserbatutako paduratan aurki daiteke, esate baterako Bizkaian Urdaibain, Arrabetako paduran, Busturialdean, Gorliz aldean eta Artibai errekako azken irlatxoan, eta Gipuzkoan Plaiaundiko marismetan.