Euskal Herrian arrunta den perretxiko hau pozointsua da. Txapel zuria 5-10 cm-koa da eta heldutan nahiko zapala. Hanka zuria eta luzea da, eta eraztun bikoitza du. Mamia zuria da baina igurtzitzean kolore horia hartzen du. Usain txarra du, fenol usaina. Uda eta udazkenean ateratzen da ongarriztatutako belardi, lorategi eta bide bazterretan. Koniferoen basoetan ere topatu daiteke. Kontu handia izan behar da Agaricus jangarriekin nahastu daitekeelako. Hala ere ez da arrunta perretxiko honek eragindako pozoindura, berotzean oso usain txarra igortzen duelako.

Artikuluari buruz Egilea: Sorrera: 2011/12/01 Azken eguneraketa: 2011/12/19 Bisita-kopurua: 1477 Motzean Taxonomia Dibisioa: Basidiomycota Klasea: Agaricomycetes Ordena: Agaricales Familia: Agaricaceae Deskribatzailea: Génev. (1876) Sinonimoak Agaricus meleagris var. grisea Agaricus pseudocretaceus Fungus xanthodermus Pratella xanthoderma Psalliota flavescens Psalliota grisea Psalliota xanthoderma Ekologia Mikorrizikoa Jateko balioa Toxikoa Perretxiko-garaia Perretxikorik ez Perretxikoak bai

Makromorfologia

Pileoa

5 cm-tatik 10 cm-tara hel daitekeen txapela du. Ez da oso mamitsua eta hasieran esferikoa den arren, pixkanaka ganbil edo ezkil forma hartzen doa. Azkenik, txapela zapala da. Txapeleko azala zuria eta leuna da, pixka bat zetakara. Gero, kolore okre samarreko ezkatez estaltzen da. Agaricus jangarrietatik bereizteko garrantzitsua izango da igurtzitzean azalak hartzen duen kolore horixka. Ertzetan kolore hau nabarmenagoa da, eta askotan, errezel himenialak edota eraztunak utzitako kondarrak daude.

Estipea

6-8 x 0,8-1,5 cm-ko hanka erraboilduna du. Luzea, zilindrikoa eta zuria da, eta igurtzitzean hau ere horiz tindatzen da. Eraztun zuri handia du oinaren goiko aldean. Bikoitza da eraztuna, goikoa hauskorra eta behekoa sendoa eta horzduna.

Orriak

Orri mehe, estu eta hertsiak ditu. Hasieran kolore zuri-okrea izaten dute, gerora arrosa eta marroia, azkenik beltza.

Mamia

Mehea eta zuria da, oinaldea horixka. Usain txarra du; fenol, iodoformo edo sendaigai usaina. Usain hau nabarmenagoa egiten da perretxikoa egosterakoan.

Mikromorfologia

Esporak

Esporek arrautza forma dute, eta 3-8 x 3,5-5 μm-ko tamaina. Marroi-beltzaxka eta purpura kolorea izaten dute.

Ekologia

Habitata

Hostozabalen baso ertzetan, koniferoen basoetan, parkeetan eta zabortegien inguruetan ateratzen da. Normalean talde txikitan agertzen da, zirkuluan. Euskal Herrian espezie nahiko arrunta da.

Perretxiko-garaia

Udan eta udazkenean ateratzen da.

Jateko balioa

Pozointsua da.