Coprinus eta antzeko perretxikoen artean eite sendoenetarikoa duen espeziea da. Lehenago Coprinus picaceus moduan ezagutzen zen. Erraz bereizten da pileoaren egitura bereizgarria dela eta. Hostozabalen basoetan aurki daiteke, eta udan eta udazkenean sortzen ditu perretxikoak.

Artikuluari buruz Egilea: erabiltzailea Sorrera: 2011/12/04 Azken eguneraketa: 2023/02/04 Bisita-kopurua: 1466 Motzean Taxonomia Dibisioa: Basidiomycota Klasea: Agaricomycetes Ordena: Agaricales Familia: Psathyrellaceae Deskribatzailea: (Bull.) Gray (1821) Sinonimoak Agaricus picaceus Coprinus picaceus Ekologia Mikorrizikoa Jateko balioa Baliogabea Perretxiko-garaia Perretxikorik ez Perretxikoak bai

Makromorfologia

Pileoa

4 eta 8 cm arteko diametroko pileoa izan ohi du. Hasieran forma oboidea izaten duen arren, heldu ahala, azpialdeko ertza zabaldu eta goranzko bidea hartzen du. Kutikula marroia izan ohi da, ildaskatua. Perretxikoa heldu gabe dagoenean errezel zuriak guztiz inguratzen duen arren, denborarekin errezela pitzatu egiten da. Ondorioz, hondo marroiak eta errezelaren hondar zuriek kontraste handiako egitura sortzen dute, espeziea identifikatzea erraztuz.

Estipea

Estipe luzeko perretxikoa eratzen du espezie honek. 9 eta 20 cm bitarteko altuera lor dezake, eta zabalera 0,6 eta 1,5 cm bitartekoa izan ohi da. Zilindrikoa da eta barrua hutsa izaten du. Azpialdea erraboil-itxurakoa du. Hasieran ezkatak nabaritzen dira estipe zurian, baina denborarekin lautu eta distira irabazten du.

Orriak

Himenoforoa orriduna da, eta horiek askeak izan ohi dira. Hasieran kolore zuria izaten dute, eta perretxikoa heldu ahala, gris-arrosa kolorea hartzen dute. Ondoren belztu egiten dira eta delikueszente bihurtu.

Mamia

Zuria, mehea eta hauskorra da. Betun-usaina du eta zapore oso gutxi.

Mikromorfologia

Esporak

Beltz-moreak eta elipsoide-formakoak dira. 14-18 μm zabal eta 10-11,5 μm luze izan ohi dira.

Ekologia

Habitata

Hostozabalen basoetan agertu ohi da, batez ere pagadietan eta lurzoru alkalinoetan.

Perretxiko-garaia

Lehenengo perretxikoak udaren amaieran agertu ohi dira, eta udazken guztian ikusi ahal izaten dira.

Jateko balioa

Ez du jateko inolako baliorik.