Amezketako San Martin auzoan kotxea utzi, eta Larrondoko kanpetara eramango gaituen GR-20 ibilbidea hartu dugu. Hurritzez eta haritzez osatutako basoan gora egin hala, pagoak, gorostiak eta elorriak ugarituz doaz. Kanpa hauetatik, Artubi mendirantz abiatu gara, Aralarreko larre hori-berdexkak zeharkatuz.

Artubitik aurrera, gailurreria jarraituz, 5 tontor egin ditugu, azkena Irumugarrieta izan delarik, Aralarreko mendirik garaiena 1.430 metrorekin. Bidean Uakorri, Beoin eta Aldaon tontorrak zapaldu ditugu, paisaia edarrak ikusteko aukerarekin.

Irumugarrietatik, Igaratzako kanpetarantz jaitsi hala, forma karstiko apartak zeharkatzeko aukera izan dugu, lapiatz inguru eta dolina mordoxka bat ikusiz. Igaratzatik behera berriz, Arritzagako haranera bidean, erliebe formak aldatzen hasten direla ikus daiteke, duela urte mordoxka Aralarren kokatu zen glaziar sistemaren arrastoak agerikoak baitira.

Hala ere, glaziar ezkutu eta ezezagun honen inguruan gehiago jakiteko, urte amaierara arte itxaron beharko duzue.