Zuhaixka txiki hau Europako mendebaldean eta Afrikako iparekialdean zehar banaturik dago. Euskal Herrian, iparraldeko mendiguneetan agertzen da txilardiak eratuz. Kolore deigarriko petalo arrosak ditu eta hori dela eta, zenbaitetan landare ornamental modura ere saldu egiten da.

80 cm-ko altuera lortzen duen zuhaixka da. Kimu gazteak arre kolorekoak dira eta sahiets ez oso nabariak dituzte, ile guruintsuekin.

Hostoak txikiak dira, 2-4 x 0,8-2 mm-koak eta bertizilotan taldekatzen dira, bertizilo bakoitzak 3-4 hosto izaten dituelarik.

Formaz lantzeolatu edo obalak dira, berde kolorekoak gainealdean eta zuriak azpialdean. Azpialdean gainera, lerro berde bat aurkezten dute eta nahiko iletsuak izaten dira. Ileak guruintsuak dira eta 1 mm-ko luzera lor dezakete.

Loreak luku motako infloreszentziatan taldekatzen dira. Infloreszentzia hauek zabalak dira hasieran baina adarraren muturrerantz luzatu ahala, estutuz doaz. Pedizelo arre-gorrixkak dituzte, iletsuak, eta bi brakteola oposatu dituzte gainealdean.

Loreak hermafroditak eta tetrameroak dira (4 sepalo eta 4 petalo). Sepaloak 2,5-4 mm-koak dira, askeak eta obatuak edo lantzeolatuak, 0,8 mm-rainoko zilioekin. Petaloak, aldiz batuta daude korola tubular bat osatuz, 8-11 mm-koa eta arrosa kolorekoa edo purpura. Estaminek apizerik gabeko anterak dituzte, korolatik zertxobait ateratzen direnak. Obarioa glabroa da.

Fruitua globo itxurako kapsula da eta hazi elipsoidal erretikulatuak dituzte.

Europako mendebaldean eta Afrikako iparekialdean zehar banaturik dago. Iberiar Penintulan ipar-mendebaldean agertzen da.