Ainar arruntaren (Calluna vulgaris) antzeko espeziea dugu hau baina bere izen espezifikoak dioen moduan, ainar purpurak itxura errauskara du eta hostoek kolore morexkak aurkezten dituzte zenbaitetan. Europako erdialde eta mendebaldean zehar banaturik dago eta Euskal Herriko iparraldeko mendiguneetan erraz ikusi daitekeen espeziea da.

60 metroko altuera lortzen duen zuhaixka da. Enborrean gutxi markatutako zenbait sahiets izaten ditu eta enbor azala zertxobait gorrixka izaten da. Gainera, guruinik gabeko iletxoz estalita dago. Iletxo zuri hauek itxura errauskara ematen diote  eta hortik datorkio, hain zuzen ere, latinezko izen espezifikoa.

Hostoak bertiziloka multzokatzen dira eta bertizilo bakoitzak 2-7 x 0,3-1 mm-ko 3 hosto izaten ditu. Hostoak formaz lantzolatuak dira eta ertzean dituzten zilioak kenduta, glabroak dira gainontzekoan.

Loreak panikula motako infloreszentzietan taldekatzen dira. Panikula hauek adarren muturretako eta alboetako lukuek eratzen dituzte. Orokorrean alboetako lukuek lore gutxiago dituzte, adarren puntetakoek baino.

Kalizak 3,5 mm-ko 4 sepalo ditu. Sepaloak aske daude eta formaz lantzeolatuak dira, hostoen antzeko berde kolorekoak. Korola, aldiz, urtzeolatua da, 7,5 mm-rainokoa eta purpura kolorekoa.

Androzeoak disko nektarifero batetik aurrera garatzen diren 8 estamin ditu. Anterak 1 mm-koak dira eta triangelu formako apendizeak dituzte. Ginezeoak obario supero tetralokularra du, glabroa.

Kapsula motako fruitua dute, glabroa. Honek bere baitan hazi txikiak gordetzen ditu, zertxobait okerrak izaten direnak.

Europako erdialde eta mendebaldean zehar banaturik dago. Iberiar Penintsulako iparraldean agertzen da, bereziki mendebaldean.