Hego-orrea izenaz ere ezaguna. Portugal eta Marruekosen ekialdetik, Iranen iparralderaino zabaltzen da. Lehortera ongi moldatutako landarea da. Mediterraneoan ugaria da, askotan artearekin, pinuarekin... batera agertzen da (oso arrunta baso pobreetan). Argitasun handia behar du; hori dela eta, mendi magal lehor eta harritsuak kolonizatzeko joera dauka eta, ez da sustratuarekiko espezifikoa. Fruitu mamitsua ematen duen Cupressaceae bakarrak dira genero honetako landareak. Gure herrian erdialdeko zein goi-mendiko espeziea da. 

10 m-ko garaierara hel daitekeen zuhaixka da. Adaburu konikoa dauka isolatuta dauden aleetan baina, irregularra bihurtzen da urteekin. Ale gazteetan adarrak enborraren oinarritik hazten dira, ale zaharragoetan aldiz, enborraren azpiko aldea libre gelditzen da. Ale zaharrek enbor zuzen eta zurruna daukate, metro bateko diametroa baino handiagoa duena. Enbor azala fina da, gris-arre kolorekoa eta, plaka eta tira finetan antolaturik dago.

Hosto iraunkorreko zuhaixka da. Hostoak hirunaka bertizilatuak ditu. Hosto gazteak erikoideak dira eta zaharrak azikularrak, 0,8 - 2,5 cm-koak eta zurrunak. Bi lerro estomatiko txuri ditu hostoaren gainazalean, nerbio berde fin baten bidez banatuak.

Landare dioikoa da. Ale arrek kono ugari dituzte, hostoaren galtzarbetan bakarka agertzen direnak. Hauek esferikoak dira eta horixkak edo gorrixkak izan daitezke. Hauek ezkata ugari dituzte, bertiziloetan kokatuta, bakoitza 3-7 polen-zakurekin azpialdean.

Ale emeek kono bakanak dituzte, hauek elkarri lotuta dauden ezkata mamitsuak dituzte. Itsura esferiko edota oboidea dute estrobiloek.

Galbulu izenez ezagutzen dira eta  8 - 15 mm-ko diametroa dute. Gazteak direnean berdeak dira eta heltzean gorriak edo arre-gorrixkak. Hauek, askotan argizari txuri-urdinxka batez estalita daude, igurzterakoan desagertzen dena eta, puntan protuberantzia txiki bat dute. Fruituek 1 - 3 hazi dituzte. Bigarren urtean heltzen dira fruituak.

Ingurune mediterraneora mugatzen da bere banaketa. Hiru subespezietan banatzen da eta, horietatik bi agertzen dira Euskal Herrian:

- Juniperus oxycedrus ssp. oxycedrus

Arruntena gure herrian.

- Juniperus oxycedrus ssp. badia (H. Gay)

Eskualde mediterraneoko gune kontinentalenetan soilik agertzen da Euskal Herrian.