Izen latinoak, "latifolia" hosto zabal esan nahi du. Mikroespezie multzo handia dago espezie honen baitan; diploideak, triploideak edo tetraploide apomiktikoak izan daitezke, baina, batzuetan ugalketa sexuala dute. Beren genoma S. aria eta S. torminalis espezietatik dator. 

20 m arteko zuhaitza. Begiak pixka bat ilupadunak ditu. 60 cm-tik gorako diametroko zurtoina du.   

Hostoak zabalki eliptikoak, oinean moztuak edo gutxi kuneatuak, noiz behinka apur bat larrukarak. Hostoaren luzera eta zabalera antzekoak izan ohi dira. Gingilak ditu, triangeluarrak, sakonera gutxikoak eta oinaldean ia zutituak. Hostoaren ertza zerratua da. Gainaldetik berdeak eta ilegabeak eta, azpialdetik ilupa grisaxka-hauskaraz estaliak. Txortenaren luzera hostoaren laurdena izan ohi da. 

Loreak muturreko korinbotan elkartuak, 5 petalo zuri dituzte eta estamin horixkak; 2 estilo askeak eta oinarrian apur bat iledunak.

Fruitua ia borobila da, arre-horixka edo gorrixka, lentizela ugariz hornitua. 

Jatorriz Frantziako Fontainebleau-koa da -Frantzia hegoaldean- eta handik zabaldu da. Europa hegoaldeko zati handi batean ageri da hainbat baso hostoerorkor zipriztinduz. Euskal Herrian arraroa da eta zenbait erkamezti eta pagadietan sakabanaturik dago.