Partenogenesi izena ematen zaio ar baten beharrik gabe emeak kumeak izateari, eta horixe bera da Amerikako Estatu Batuetako krotalo suge basatietan aurkitu berri dutena. Partenogenesi fakultatiboa ohikoa da ornogabe askotan, eta hainbat ornodunetan ere gertatzen da: etxe-oiloetan, hainbat muskerretan, suge gutxi batzuetan eta marrazoetan, besteak beste. Kasu ia guztietan, ordea, gatibutzan zeuden animalietan deskribatu da fenomenoa. Tulsako Unibertsitateko (Oklahoma, AEB) ikerlariek, ordea, Crotalinae familiako sugeetan fenomenoa uste baino askoz ere arruntagoa dela azaldu berri dute.
Partenogenesian obulua espermatozoideak ernaldu gabe garatzen da. Beraz, kumeek amaren informazio genetikoa berenganatzen dute: genetikoki amaren berdin-berdinak dira, beraz. Ugalketa sexualean, aldiz, aitaren eta amaren informazio genetikoa nahasten da, eta kumeak bien arteko nahasketa dira, horrenbestez. Ugalketa sexuala organismoen eboluzioan berebiziko garrantzia duen fenomenoa da, belaunaldien aldakortasunaren sortzaile nagusia baita.
Ikerlariek bi suge espezietako dozenaka amaren eta kumeren informazio genetikoa aztertu dute, eta aztertutako populazioetan jaiotako kumeen % 2,5-5 partenogenesi bidez jaio direla ondorioztatu. Kume partenogenetikoen proportzioa handia da, beraz. Ikerlariek, ordea, ez dakite oraindik emeak gai diren ugalketa mota aukeratzeko edota zoriaren ondorioa den kumeak sexualki edo asexualki sortzea.
Ugaztun plazentalioetan fenomeno hori gertatzea ia ezinezkotzat jotzen da, ugaztunek inpronta genetikoa ezinbestekoa baitute ugaltzeko. Hau da, bi sexuak ezinbestekoak dira enbrioiak garatzeko.
-
Euskal Herriko naturzaleek zita izango dute Donostian azaroan
2013/09/16 , UEU Heziketa Natura Zientzia Ingurumena -
Itsas izarrek ikusteko gaitasuna dute
2014/04/07 , Zientzia -
Izotz-bankisako arrakaletako metano ateraketak
2012/05/12 , Heziketa Natura Zientzia Ingurumena -
Topaketaren aurkezpena, bideoak, elkarrizketak eta azken informazioa
2013/10/10 , UEU Heziketa Natura Zientzia Ingurumena -
Ugatza berreskuratu nahian
2012/05/21 , Natura Zientzia Ingurumena