Animalia konkretu batzuk ikustea oso zaila den arren, beraien oinatz, arrasto edota seinaleek beraien presentziaren berri ematen digute. Martxoaren 2an, Euskadiko Biologoen Elkargo Ofizialak Alluitz Naturarekin batera ikastaro bat antolatu zuen gai honen inguruan eta bertan izan nintzen ni. Arabako Astulez herritik hasi eta Burgosekin muga egiten duten inguruko mendietan zehar ibili ginen Felix Martinez de Lezea biologoa gidari geneukala, bere azalpenak entzuten. Bide guztia elurtuta zegoenez, arrasto dexente ikusi genituen eta horietako batzuk erakutsiko dizkizuet gaurkoan.

Sekula oinatzak identifikatzen saiatu baldin bazarete, liburuetan oso politak agertzen direla ikusiko zenuten, baina mendian aldiz, gauzak ez direla hain errazak konturatuko zinaten. Elurretan zein lokatzetan, batzutan ez dira oinatzen formak oso ondo bereizten, baina elurrak badauka abantaila handi bat. Izan ere, oinatz bakarra ikusi beharrean, arrasto guztia ikusi dezakegu. Hau da, oinatz denak jarraian ikusten dira, eta hau oso lagungarria izan daiteke animaliak identifikatzeko orduan. Adibidez, otsoaren eta txakur handi baten oinatzak oso berdinak dira, baina otsoaren pausoak luzeagoak izan ohi dira eta beraz, oinatzen arteko distantzia handiagoa izan ohi da.

Oinatzez gain, beste seinale ugarik ematen digu animalien presentziaren berri. Elikatzen direnean adibidez, pista dexente uzten dituzte eta gorotzen bidez ere identifikatu daitezke inguruan bizi diren animaliak.

Segidan, irteeran ikusitako oinatz batzuk eta elikatzen ibili direla erakusten diguten hainbat seinale dituzue ikusgai, azalpen batzuekin lagunduta.

Besterik ez, ondo segi!!