Akordioa Europar Batasuneko (EB) 27 kideek, Australiak, Suitzak eta beste zortzi herrialde industrializatuk sinatu dute eta guztiek zehaztu dituzte protokoloa betetzeko helburu zehatzak. Hala ere, herrialde horiek mundu mailan berotegi-efektuko gasen emisioaren %15ren erantzule dira soilik. Kanpoan gelditu dira berotegi-efektuko igorle nagusi diren herrialdeak, besteak beste, Ameriketako Estatu Batuak (AEB), Txina eta India. Errusiak ere desadostasuna adierazi du akordioarekin, berotegi-efektuko gas gehiago igortzeko aukera eskatu du bere industria Sobietar Batasunaren gainbeheratik errekuperatu dela argudiatuz. Aurkako argudio berdintsuak aurkeztu dituzte Europako ekialdeko zenbait herrialdek, Polonia denen buru.

“Akordioa apala baina beharrezkoa” izan dela iritzi du Europako Kontseiluaren ordezkariak eta NBEren idazkari nagusi den Ban Ki-moon ere “gehiago egin” beharra dagoenaren ustean da. Greenpeace-en zuzendaritza taldeko kide den Kumi Naidook adierazi du elkarrizketen emaitzak etsigarriak izan direla oso. “Ezarritako helburuak ez dira ebidentzia zientifikoak iradokitzen dizkigunetara gerturatu ere egiten. Beste behin, irabazle nagusiak petrolio-, ikatz- eta gas-konpainiak izan dira”.

Akordioaren beste puntu korapilatsu bat herrialde garatuek garapenean direnei berotegi-efektu globalari aurka egiteko eman beharreko dirua izan da. Herrialde garatuei presioa egin zaie azal dezaten 2020 urtea bitartean garapenean diren herrialdeei hitzartutako 100.000 milioi dolarrak noiz eta nola emango zaizkien. Finantza-krisia aitzaki, EBk eta AEBk ez dute finantzamendu horren inguruan erabakirik hartu nahi izan.

Leave a comment