Txilar lauhostoa zohikaztegietan hazten den txilarra dugu. Zuhaixka honek lore ugari izaten ditu adarren muturrean eta launaka multzokatzen diren hosto txikiak, espezieari izena ematen diotenak. Europako ipar-mendebaldean zehar zabaldurik dago.

Tamaina txikiko zuhaixka da, normalean ez baititu 45 cm-ak gainditzen. Bere adarrek sahiets nabarmenak dituzte. Adartxo hauek kolore gorrikoak dira eta ile luzeak izaten dituzte, guruintsuak.

Hostoak launaka multzokatuta agertzen dira bertiziloetan eta ezaugarri honek ematen dio, hain zuzen ere, izena landareari. Hostoek 3,5-8 x 0,6-1,5 mm neurtzen dituzte eta forma linearra dute, banda zurixka batekin azpialdean. Ertzean ile guruintsuak eta guruinik gabeak dituzte.

Loreak unbela motako infloreszentzia terminal batean multzokatzen dira. Infloreszentzia hauek lore asko izaten dituzte, 15 arte. Loreen brakteek ez dute inbolukrurik eta pedizelo iletsuak dituzte.

kalizak 3,5 mm-ko lau sepalo ditu. Sepaloak elkarren artean aske daude eta formaz oblongo-lantzeolatuak dira. Kolore purpura dute eta iletxo ez guruintsuak eta guruintsuak muturrean.

Korola 6-7,5 mm-koa da eta formaz urtzeolatu. Elkarren artean lotutako lau petaloz osaturik dago eta kolorez arrosa edo gorrixka da.
Androzeoak 8 estamin ditu diska nektarifero batean txertaturik eta anteren apendizeek forma triangeluarra dute. Ginezeoak goi-obarioa du, tetralokularra, guruintsua eta iletsua. Estiloak 5,5 mm ditu eta korolatik zertxobait nabarmentzen da.

Globo formako kapsula da txilar honen fruitua. Kapsula hau iletsua da eta hazi elipsoidal eta oboide ugari ditu bere baitan.

Europako ipar-mendebaldean zehar banaturik dago eta Iberiar Penintsulan ere ipar-mendebaldean da bereziki ugaria.