Espezie honetako indibiduo gazteek beltzez inguraturiko gorbata zuri-horia izan ohi dute, hortik datorkio izen arrunta. Bere mugitzeko modu traketsa dela eta, erraz harrapatu daiteke, gainera, ez da pozoitsua. Euskal Herri osoan aurki daiteke.

Emeak 200 cm-ko luzera izan dezakeen arren, normalean ez ditu 100 cm baino gehiago izaten eta arra emea baino txikiagoa izan ohi da. Helduek gorputz lodia izaten dute. Ongi definituriko buru zabala, mutur borobildua eta begian laranja edo gorri koloreko iris borobila izan ohi du (Andrada 1985; Arnold & Burton 1982; Barbadillo 1987). Ezpaingainean zazpi ezkata –hirugarrenak eta laugarrenak begia inguratzen dute–, ezkata preokular bat eta hiru postokular ditu. Ezkata dortsal karenatuek 19 lerro osatzen dituzte eta 157-181 ezkata bentral ditu (Andrada 1985; Arnaldo & Ovenden 2002; Barbadillo 1987). 

Bizkarraldean kolore grisaxka, berdexka edo marroixka du, nahiko uniformea eta orban ilun txikiak ere izaten ditu. Alde bentralean zuri-grisa da orban beltzak karratuekin. Gazteek helduetan desagertzen den beltzez inguraturiko gorbata zuri-horia izaten dute (Andrada 1985; Arnaldo & Ovenden 2002; Barbadillo 1987).

Iberiar penintsula guztian eta ia Europa guztian topa daiteke, irla batzuetan izan ezik (Irlanda, Malta, Kreta...). Afrika ipar-mendebaldean eta Asia ekialdean ere ageri da (Arnold & Burton 1982; Arnold & Ovenden 2002).

Gune hezeetan bizi da, normalean uretatik gertu eta larre, zuhaixkadi eta baso lehorretan aurki daiteke (Andrada 1985). 2.000 m-tik gora ere bizi daiteke (Arnold & Burton 1982; Barbadillo 1987).

Batez ere anuroez (Rana, Bufo, Discoglossus, Alytes) eta arrainez (Phoxinus, Leuciscus) elikatzen da (Andrada 1985; Barbadillo 1987). Noizbehinka mikrougaztunak eta urodeloak ere harrapatzen ditu. Indibiduo gazteak, berriz, batez ere ornogabe eta anfibio txikiez elikatzen dira, bereziki metamorfosia jasan berri dutenetaz (Barbadillo 1987).

Araldia udaberrian eta udazkenean izan dezake, baina arrautzak ekainean soilik erruten ditu, eme batek 11-53 arrautza zuri luzanga jarri ditzakeelarik. Normalean eme bakoitzak gune batean jartzen baditu ere, batzuetan eme ezberdinek batera jartzen dituzte arrautzak, baita beste espezie batzuekin batera ere, esaterako Natrix maura. Arrautzak 4-11 aste bitartean eklosionatu daitezke (Andrada 1985; Barbadillo 1987). 

Suge gorbataduna egunez ibiltzen den espezie urtarra da, Natrix maura urtarragoa bada ere (Andrada 1985). Urria-azarotik otsaila-martxora arte hibernatu egiten du (Barbadillo 1987).

Mugimendu traketsez mugitzen denez, erraza da harrapatzen. Ez du horzkadarik egiten, baina  txistua jo (Arnold & Burton 1982) eta usain desatsegina sortzen du guruin anala hustutzen duenean (Andrada 1985; Arnaldo & Ovenden 2002).

Suge gorbatadunaren depredatzaileen artean zangaluzeak (Ardea, Ciconia...), hegazti harrapariak (Milvus, Buteo, Hieraetus, Circaetus) eta ugaztunak (trikuak eta hainbat mustelido) daude besteak beste (Barbadillo 1987).