Zere txikia, Balaenoptera generoan aurkitzen den animaliarik txikiena da, bere tamaina 8 metro ingurukoa izanik. Nahiz eta txikiena izan, espezie hau bere familiako animaliarik bizkorrena eta baita hedatuena da. Zere txikia ezagutzeko, ezaugarririk nabarmenena hegats bakoitzean duen banda zuria da; honek kontraste handia egiten du bere kolore ilunarekin, eta honen bidez erraz ezagutu daiteke. Negu partean Bizkaiako golkoan aurkitu daitekeen espeziea da.

Zere txikiak burua kono itxurakoa du. Hegats dortsala nahiko altua da (genero berdineko espezie desberdinekin konparatuz), eta gainerako hegatsak estuak eta puntadunak dira. Aho azpikaldean 50-70 tolestura ditu, eta ahoan berriz 231-285 bizar pare, horixka kolorekoak direnak. Animalia honen kolorea ezaugarri berezigarria da: dortsalki iluna eta bentralki zuria da, eta lehenago aipatu bezala, hegats bakoitzean banda zuriak ditu. Zere txiki jaioberri baten tamaina 2-2,8 metrotakoa da, eta heldua 6,5-8,5 metrotakoa izatera heldu daiteke. Espezie honetan, emea arra baino handiagoa izaten da, eta eduki dezaketen pixu maximoa 9 tonakoa da.

Animalia hau nahiko hedatua dago: artikotik ur tropikaletarainoko itsasoan zehar banatzen da.

Espezie hau kostaldetik urrun zein gertu aurkitu daiteke. Neguan latitude baxuetara emigratzen du (ur tropikaletara) kumea erditzeko, eta udan berriz artikoko uretara joaten da. 

Animalia honen elikadura urtaro eta kokapenaren arabera aldatu egiten da, baina oro har arrainek paper garrantzitsua joaktzen dute Zere txikiaren elikaduran. Udaberrian, dietaren zati garrantzitsu bat Gadiformes ordeneko arrainek (bakailua, faneka, ...) betetzen dute. Uda eta udazkenean berriz, batez ere Krill-az elikatzen da. ikusi da, Zere txikiek aukeran nahiago dituztela arrainak krill-a baino, baina egoeraren arabera bata edo bestea jaten dute (Haug et al. 1996).

Beste ugaztun batzuekin konparatuta, Zere txikiak ugalketa motela dutela esan daiteke. Emeek urtean behin erditzen dute, haurdunaldiak 10-11 hilabete irauten dituelarik; erditzea latitude baxuko guneetan ematen da, negu hasieran, eta haurdunaldi bakoitzeko emeak kume bat izaten du.

Edoskitze-patroiari dagokionez, bere genero bereko beste espezie batzuekin konparatuz desberdina da. Zere txikian, edoskitzea kume jaio eta ondorengo 5-6 hillabetetan ematen da, eta ondoren kumeek latitude altuagoetara migratzen dute elikatzera (Oftedal 1997).

Zere txikia talde txikitan bizi da (banaka, binaka, hirunaka), baina elikatzeko garaian maiz talde handiagoetan elkartzen dira. Adin eta sexuaren araberako taldekamendua dute, eta ikusi da espezie honek egitura sozial konplexua duela.

Orka (Orcinus orca), Zere txikiaren harrapakari garrantzitsu bat dela esan daiteke.