Pagoen adar erorietan edo pago bizien enborren zaurietan agertzen da perretxiko hau. Izaera likatsua agertu arren, bere kolore zuri distiratsuak eta sortak izaten duen forma estilizatuak itxura ederra ematen dio perretxikoari. Bertatik lortzen da “muzidina”  deritzon antibiotikoa, eta produktu hau oso aproposa da mikosiaren aurka egiteko.

Artikuluari buruz Egilea: Sorrera: 2011/12/21 Azken eguneraketa: 2013/03/29 Bisita-kopurua: 982 Motzean Taxonomia Dibisioa: Basidiomycota Klasea: Basidiomycetes Ordena: Agaricales Familia: Physalacriaceae Deskribatzailea: (Schrad.) Höhn. (1910) Sinonimoak Agaricus mucidus Armillaria mucida Collybia mucida Lepiota mucida Mucidula mucida Ekologia Saprobio lignikola Jateko balioa Baliogabea Perretxiko-garaia Perretxikorik ez Perretxikoak bai

Makromorfologia

Pileoa

Txapela oso likatsua da. Hasieran forma ganbila agertzen du, eta gero pixkanaka zapaldu egiten da. Bere diametroa 8 cm izatera hel daiteke eta gehienetan zuri-zuria izan arren, batzuetan tonu grisaxkak ditu.

Estipea

Hanka motza, zuntzezkoa eta zilindrikoa da. Bere ekologia dela eta hanka kurbatua izaten da, eta txapelaren kolore berdina du. Estipearen goialdean eraztun handi zuri ildaskatua du, lehorra gainetik eta leun eta likatsua azpitik.

Orriak

Orri oso zabalak eta bigunak ditu. Kolore zuria dute eta adnatu edo dekurrente samarrak dira.

Mamia

Kolore zuriko mami mehea eta biguna du, erraz usteltzen da.

Mikromorfologia

Esporak

Esporak oso handiak (14-18 x 12-16 μm) eta zuriak dira. Formari dagokionez, esferikoak eta leunak.

Ekologia

Habitata

Pagoen adar apurtu edo erorietan, ustelduetan, gaixotuetan edota pago bizien zaurietan agertzen da.

Perretxiko-garaia

Udan eta udazkenean oso arrunta izaten da.

Jateko balioa

Ia usainik ez du izaten eta jangarria bada ere, jateak ez du merezi, zapore geza izaten baitu.