Gure lurretan ohikoa da askomikoto txiki hau. Deigarria den bere kolore urdin-berdea izan ezik ez dauka inongo bereizgarririk. Hostozabalen basoetan, lurrera eroritako adar ustelduen gainean aurkitzen da uda eta udazkenean. Fruitu-gorputza ikusten ez bada ere, bere hazkuntzak eragiten duen orbain urdin-berdea oso maiz topatzen da adarretan.

Artikuluari buruz Egilea: Sorrera: 2013/09/07 Azken eguneraketa: 2013/09/14 Bisita-kopurua: 1206 Motzean Taxonomia Dibisioa: Ascomycota Klasea: Pezizomycotina Ordena: Helotiales Familia: Helotiaceae Deskribatzailea: (Nyl.) Kanouse Sinonimoak Peziza aeruginascens Chlorosplenium aeruginascens Ekologia Saprobio lignikola Jateko balioa Baliogabea

Makromorfologia

Fruitu gorputza

Tamaina txikiko (2-5 mm) askoma garatzen duen onddoa da gardinga.  Hasieran apotezioak kopa itxura dauka, baina alea heltzen doan heinean zabaltzen joaten da, ale zaharretan laua izanik. Onddo txiki honen bereizgarri nagusia bere kolore urdin-berdexka da. Erpinak zertxobait argiagoak izaten dira. 

Onddo honek hanka laburra garatzen du, 2-3 mm-takoa. Koloreari dagokionez, karpoforoaren kolore berdinekoa da.

Mami gutxiko askomikotoa, zapore eta usain berezi gabekoa. Ehundurari dagokionez, hauskorra eta argizarikara da. Kolore uniformekoa da, urdin-berdexka.

Mikromorfologia

Esporak

6-10 x 1,5-2 µm-tako esporak fusiformeak dira. Espora hauek gardenak eta leunak dira. Esporaren erdialdean, ekidistanteki banaturik, hiru apaindura izaten dituzte.

Ekologia

Habitata

Lurrean usteltzen ari diren hostozabalen adarretan hasten den onddoa da. Pago adarretan behatu da batez ere eta nolabaiteko preferentzia azaltzen du azalik gabe dauden adarrekiko.

Perretxiko-garaia

Neguko hilabeteetan izan ezik beste hilabete guztietan aurki daiteke onddo hau. Hala ere uda eta udazken hasieran da ugariena.

Jateko balioa

Ez dauka inongo balio gastronomikorik, ez baitauka ez usain ez zapore berezirik. Horrez gain mami oso gutxikoa da.